Disque as mellores cantigas agroman nas tabernas e de alí espállanse polo mundo. Somos conscientes desta realidade e por iso recuncamos un ano máis organizando o Certame de Cantos de Taberna o día 31 de outubro a partires das 15:00 horas, coincidindo coa celebración da segunda xornada do Castañazo.

BASES DE PARTICIPACIÓN

  1. Os grupos participantes estarán integrados por un máximo de 10 persoas que en ningún momento se poderá exceder.
  2. A inscrición é de balde e poderase realizar, ata completar un límite de 8 grupos, escribindo ao enderezo electrónico : cantosdetaberna@castanhazo.com
  3. A inscrición poderase realizar ata o domingo 25 de outubro ou, de ser o caso, ata completar o tope de grupos. Para a inscrición precisarase o nome do grupo, un teléfono de contacto e o número de integrantes.
  4. A recepción dos grupos terá lugar o propio día sábado 31 de outubro entre as 14:45 e as 15:00 horas na Praza da Paz (ao lado do bar Época) de Chantada. Prégase puntualidade co fin de axilizar a actividade dacordo o programa do festival. A hora de remate será as 18:15 horas.
  5. Cada grupo tocará en tres tabernas durante o percorrido e, en cada taberna, estará aproximadamente 30 minutos.
  6. Durante a súa actuación tocarán varias pezas, de libre escolla, do repertorio popular ou composicións propias ou orixinais.
  7. Cada taberna convidará ás persoas integrantes a 1 consumición (auga, viño, cervexa ou refresco).
  8. Atendendo as suxerencias en edicións anteriores non vai haber puntuación nin premios, polo que todos os participantes serán gañadores e o premio final será desfrutar da festa.

Para rematar, a partires das 18:30 contaremos co pasarrúas da Mekánica Rolling Band.