Disque as mellores cantigas agroman nas tabernas e de alí espállanse polo mundo. Somos conscientes desta realidade e por iso recuncamos un ano máis organizando o Certame de Cantos de Taberna o día 1 de novembro a partires das 15:00 horas, coincidindo coa celebración da segunda xornada do Castañazo.

BASES DE PARTICIPACIÓN

1. Os grupos participantes estarán integrados por un máximo de 10 persoas que en ningún momento se poderá exceder.
2. A inscrición é de balde e poderase realizar, ata completar un límite de 12 grupos, escribindo ao enderezo electrónico : cantosdetaberna@castanhazo.com
3. A inscrición poderase realizar ata o domingo 26 de outubro ou, de ser o caso, ata completar o tope de grupos. Para a inscrición precisarase o nome do grupo, un teléfono de contacto e o número de integrantes.
4. A recepción dos grupos terá lugar o propio día sábado 1 de novembro entre as 15:00 e as 15:15 horas na Praza da Paz (ao lado do bar Época) de Chantada. Prégase puntualidade co fin de axilizar a actividade dacordo o programa do festival. A hora de remate será as 18:00 horas.
5. Cada grupo poderá interpretar en cada taberna 2 pezas, de libre escolla, do repertorio popular ou composicións propias ou orixinais.
6. Cada taberna convidará ás persoas integrantes a 1 consumición (auga, viño, cervexa ou refresco).
7. Atendendo as suxerencias en edicións anteriores non vai haber puntuación nin premios, polo que todos os participantes serán gañadores e o premio final será desfrutar da festa.

O CASTAÑAZO É UN ESPAZO LIBRE DE VIOLENCIA MACHISTA.

Polo tanto, rexeita con rotundidade calquera conduta contra a igualdade de todas as persoas. Asi pois, tamén nos cantos, fai un chamamento aos grupos para que procuren evitar contidos machistas, misóxinos e homófobos que tanto abundan na tradición, mais que poden e deben ser actualizados para non contribuir a perpetuar unha discriminación que ten demasiados séculos de vida. Nós decidimos que parte da tradición paga a pena conservar a transmitir.

Para rematar, a partires das 18:00 horas contaremos co pasarrúas da Mekánica Rolling Band.